ದನದ ಮಾಂಸ ಮಾರಾಟದಲ್ಲಿ 40 ಕೆ.ಜಿ ಮಾಂಸ, ಕತ್ತಿ–ಚಾಕುಗಳು ಜಪ್ತಿ

ಚಿಕ್ಕಮಗಳೂರು: ನಗರದ ಅಯ್ಯಪ್ಪನಗರದ ಸಮೀಪದ ಶೆಡ್‌ನಲ್ಲಿ ಯಾವುದೇ ಪರವಾನಗಿ ಇಲ್ಲದೆ ದನದ ಮಾಂಸ ಮಾರಾಟ ಮಾಡುತ್ತಿದ್ದ ಆರೋಪದ ಮೇಲೆ ನಗರ ಠಾಣೆ ಪೊಲೀಸರು ವ್ಯಕ್ತಿಯೊಬ್ಬನ ವಿರುದ್ಧ ಪ್ರಕರಣ ದಾಖಲಿಸಿಕೊಂಡಿದ್ದಾರೆ.

ಆ.9ರಂದು ಮಧ್ಯಾಹ್ನ ಮಲ್ಲಂದೂರು ರಸ್ತೆಯಲ್ಲಿ ಪೊಲೀಸರು ಗಸ್ತಿನಲ್ಲಿದ್ದಾಗ, ಅಯ್ಯಪ್ಪನಗರದ ಬಳಿಯ ಶೆಡ್‌ನಲ್ಲಿ ಹಫೀಜ್ ಎಂಬಾತ ಅಕ್ರಮವಾಗಿ ದನದ ಮಾಂಸ ಮಾರಾಟ ಮಾಡುತ್ತಿದ್ದಾನೆ ಎಂಬ ಮಾಹಿತಿ ಪೊಲೀಸರಿಗೆ ಲಭಿಸಿದೆ.

ಮಾಹಿತಿ ಆಧರಿಸಿ ಪಂಚರ ಸಮ್ಮುಖದಲ್ಲಿ ಪೊಲೀಸರು ಶೆಡ್ ಮೇಲೆ ದಾಳಿ ನಡೆಸಿದಾಗ, ಹಫೀಜ್ ಬಿನ್ ಅನ್ವರ್ ಅಹಮ್ಮದ್ (19) ಎಂಬಾತ ಅಲ್ಲಿದ್ದನು. ಶೆಡ್‌ನಲ್ಲಿ ಮಾಂಸವನ್ನು ಹುಕ್ಕುಗಳಲ್ಲಿ ನೇತು ಹಾಕಿರುವುದು ಹಾಗೂ ದನದ ತಲೆ ಮತ್ತು ನಾಲ್ಕು ಕಾಲುಗಳು ಪತ್ತೆಯಾಗಿವೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಪರಿಶೀಲನೆ ವೇಳೆ ಒಟ್ಟು 40 ಕೆ.ಜಿ. ದನದ ಮಾಂಸ, ಅಂದಾಜು ₹12 ಸಾವಿರ ಮೌಲ್ಯದ ಮಾಂಸ ಪತ್ತೆಯಾಗಿದ್ದು, ಜೊತೆಗೆ ಡಿಜಿಟಲ್ ತಕ್ಕಡಿ, ಎರಡು ಚಾಕುಗಳು, ಒಂದು ಕಬ್ಬಿಣದ ಕತ್ತಿ, ಆರು ಕಬ್ಬಿಣದ ಹುಕ್ಕುಗಳು ಹಾಗೂ ಒಂದು ಅರ ಸೇರಿದಂತೆ ಸಾಮಗ್ರಿಗಳನ್ನು ಜಪ್ತಿ ಮಾಡಲಾಗಿದೆ.

ಮಾಂಸ ಮಾರಾಟಕ್ಕೆ ಯಾವುದೇ ಪರವಾನಗಿ ಇಲ್ಲ ಎಂದು ಆರೋಪಿ ತಿಳಿಸಿದ್ದು, ಟಿಪ್ಪುನಗರದ ಮುಜೀಬ್ ಅಲಿಯಾಸ್ ಮುಜ್ಜು ಎಂಬಾತನಿಂದ ಮಾಂಸವನ್ನು ಪಡೆದು ಮಾರಾಟ ಮಾಡುತ್ತಿದ್ದುದಾಗಿ ಹೇಳಿರುವುದಾಗಿ ಪೊಲೀಸ್ ವರದಿಯಲ್ಲಿ ಉಲ್ಲೇಖಿಸಲಾಗಿದೆ.

ಘಟನೆ ಸಂಬಂಧ ನಗರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಿಸಿಕೊಂಡಿದ್ದು, ಮಾಂಸ ಎಲ್ಲಿಂದ ತರಲಾಗಿತ್ತು ಹಾಗೂ ಪ್ರಕರಣದಲ್ಲಿ ಇತರರು ಭಾಗಿಯಾಗಿದ್ದಾರೆಯೇ ಎಂಬುದರ ಕುರಿತು ಪೊಲೀಸರು ತನಿಖೆ ಮುಂದುವರಿಸಿದ್ದಾರೆ.