ನೀಲಕುರಿಂಜಿ ಅಲ್ಲ, ಚಂದ್ರದ್ರೋಣದಲ್ಲಿ ಅರಳಿದ್ದು ಗುರಿಂಜೆ

ಚಿಕ್ಕಮಗಳೂರು: ಕಾಫಿನಾಡಿನ ಪ್ರಸಿದ್ಧ ಚಂದ್ರದ್ರೋಣ ಪರ್ವತ ಶ್ರೇಣಿಯ ಮುಳ್ಳಯ್ಯನಗಿರಿ–ಬಾಬಾಬುಡನ್‌ಗಿರಿ ಪ್ರದೇಶದಲ್ಲಿ ನೇರಳೆ ಬಣ್ಣದ ಹೂವುಗಳು ಅರಳಿ ಪ್ರವಾಸಿಗರ ಗಮನ ಸೆಳೆಯುತ್ತಿವೆ. ಸಾಮಾಜಿಕ ಜಾಲತಾಣಗಳಲ್ಲಿ ಈ ಹೂವುಗಳನ್ನು 12 ವರ್ಷಕ್ಕೊಮ್ಮೆ ಅರಳುವ ಪ್ರಸಿದ್ಧ ನೀಲಕುರಿಂಜಿ ಎಂದು ಬಿಂಬಿಸಲಾಗುತ್ತಿದ್ದು, ರಾಜ್ಯದ ವಿವಿಧ ಭಾಗಗಳಿಂದ ಪ್ರವಾಸಿಗರು ಚಂದ್ರದ್ರೋಣಕ್ಕೆ ಆಗಮಿಸುತ್ತಿದ್ದಾರೆ. ಆದರೆ, ಪ್ರಸ್ತುತ ಅರಳಿರುವ ಹೂವುಗಳು ನೀಲಕುರಿಂಜಿ ಅಲ್ಲ ಎಂದು ಸಸ್ಯಶಾಸ್ತ್ರಜ್ಞರು ಹಾಗೂ ಪ್ರಕೃತಿ ತಜ್ಞರು ಸ್ಪಷ್ಟಪಡಿಸಿದ್ದಾರೆ.

ಗಿರಿಕಂಡದ ಗಾಳಿಕೆರೆ ರಸ್ತೆಯುದ್ದಕ್ಕೂ ಹಾಗೂ ಪರ್ವತದ ಕೆಲವು ಭಾಗಗಳಲ್ಲಿ ಕಾಣಿಸುತ್ತಿರುವ ಹೂವುಗಳು ಗುರಿಂಜೆ (Strobilanthes heyneana Nees) ಪ್ರಭೇದಕ್ಕೆ ಸೇರಿವೆ. ಗೊರಟೆ ಹೂವಿನ ಕುಟುಂಬಕ್ಕೆ ಸೇರಿದ ಈ ಸಸ್ಯ ಪ್ರತಿ ವರ್ಷವೂ ಹೂ ಬಿಡುತ್ತದೆ. ಹೊರನೋಟಕ್ಕೆ ನೀಲಕುರಿಂಜಿಯಂತೆ ಕಾಣುವುದರಿಂದ ಪ್ರವಾಸಿಗರಲ್ಲಿ ಗೊಂದಲ ಉಂಟಾಗಿದೆ ಎಂದು ಸಸ್ಯಶಾಸ್ತ್ರ ಉಪನ್ಯಾಸಕ ಸೋಮಶೇಖರ್ ತಿಳಿಸಿದ್ದಾರೆ.

ವೈಜ್ಞಾನಿಕವಾಗಿ Strobilanthes kunthiana ಎಂದು ಕರೆಯಲಾಗುವ ನಿಜವಾದ ನೀಲಕುರಿಂಜಿ ಸಾಮಾನ್ಯವಾಗಿ 12 ವರ್ಷಗಳಿಗೊಮ್ಮೆ ಸಾಮೂಹಿಕವಾಗಿ ಅರಳುತ್ತದೆ. ಚಂದ್ರದ್ರೋಣ ಪರ್ವತದಲ್ಲಿ 2022ರಲ್ಲಿ ದೊಡ್ಡ ಪ್ರಮಾಣದಲ್ಲಿ ನೀಲಕುರಿಂಜಿ ಅರಳಿ ಹಲವು ಪ್ರದೇಶಗಳು ನೇರಳೆ ಬಣ್ಣದಿಂದ ಕಂಗೊಳಿಸಿದ್ದವು. ಮಾಣಿಕ್ಯಧಾರ ರಸ್ತೆ, ಸೀತಾಳಯ್ಯನಗಿರಿ ಹಾಗೂ ಕವಿಕಲ್ ಮಠದ ಸುತ್ತಮುತ್ತಲಿನ ಪ್ರದೇಶಗಳಲ್ಲಿ ಆಗ ಹೂವುಗಳು ಕಂಡುಬಂದಿದ್ದವು.

ಈ ಬಾರಿ ಗಾಳಿಕೆರೆ ರಸ್ತೆಯಲ್ಲಿ ಅಲ್ಲಲ್ಲಿ ಬಿಡಿಬಿಡಿಯಾಗಿ ಹೂವುಗಳು ಕಂಡುಬರುತ್ತಿವೆಯೇ ಹೊರತು, ಇಡೀ ಪರ್ವತ ಶ್ರೇಣಿ ನೀಲಕುರಿಂಜಿಯಿಂದ ಆವೃತವಾಗಿಲ್ಲ. ಹಳೆಯ ನೀಲಕುರಿಂಜಿ ಹೂವುಗಳ ವಿಡಿಯೋಗಳನ್ನು ಪ್ರಸಕ್ತ ವರ್ಷದ ದೃಶ್ಯಗಳೊಂದಿಗೆ ಹಂಚಿಕೊಳ್ಳುತ್ತಿರುವುದೇ ಗೊಂದಲಕ್ಕೆ ಕಾರಣವಾಗಿದೆ.

ನೀಲಕುರಿಂಜಿ ನೋಡಲು ಮೈಸೂರಿನಿಂದ ಬಂದ ಪ್ರವಾಸಿಗರೂ ನಿರಾಶೆ ವ್ಯಕ್ತಪಡಿಸಿದ್ದಾರೆ. ಈ ನಡುವೆ ಹೆಚ್ಚುತ್ತಿರುವ ಪ್ರವಾಸಿಗರ ದಟ್ಟಣೆಯಿಂದ ಶೋಲಾ ಅರಣ್ಯ ಹಾಗೂ ಹುಲ್ಲುಗಾವಲುಗಳಂತಹ ಸೂಕ್ಷ್ಮ ಪರಿಸರ ಪ್ರದೇಶಗಳ ಮೇಲೆ ಒತ್ತಡ ಉಂಟಾಗುವ ಆತಂಕ ವ್ಯಕ್ತವಾಗಿದೆ.

ಆದ್ದರಿಂದ ಸಾಮಾಜಿಕ ಜಾಲತಾಣಗಳಲ್ಲಿನ ವಿಡಿಯೋಗಳನ್ನು ಮಾತ್ರ ನಂಬದೆ, ಅರಣ್ಯ ಇಲಾಖೆ ಹಾಗೂ ಅಧಿಕೃತ ಮೂಲಗಳಿಂದ ಮಾಹಿತಿ ದೃಢಪಡಿಸಿಕೊಂಡು ಪ್ರವಾಸ ಕೈಗೊಳ್ಳುವಂತೆ ಪ್ರಕೃತಿ ಪ್ರೇಮಿಗಳು ಮನವಿ ಮಾಡಿದ್ದಾರೆ.

It is not Neelakurinji; what bloomed in Chandradrona is Gurinje.