ಬಾ ಬುಡನ್ ದರ್ಗಾದಲ್ಲಿ ಶಾಂತಿಯುತ ರೋಟಿ ಭಾಜಿ ಫಾತಿಹಾ

ಚಿಕ್ಕಮಗಳೂರು: : ಇನಾಂ ದತ್ತಾತ್ರೇಯ ಪೀಠ ಗ್ರಾಮದಲ್ಲಿರುವ ಹಜರತ್ ದಾದಾ ಹಯಾತ್ ಮೀರ ಖಲಂದರ್ ಬಾಬಾ ಬುಡನ್ ದರ್ಗಾದಲ್ಲಿ ಸಯ್ಯದ್ ಬುಡನ್ ಶಾ ಖಾದ್ರಿ ವಂಶಸ್ಥರ ಟ್ರಸ್ಟ್ ವತಿಯಿಂದ ಐತಿಹಾಸಿಕ ರೋಟಿ ಭಾಜಿ ಫಾತಿಹಾ ಧಾರ್ಮಿಕ ಆಚರಣೆಯನ್ನು ಸೋಮವಾರ ಶಾಂತಿಯುತವಾಗಿ ನಡೆಸಲಾಯಿತು.

ಈ ಧಾರ್ಮಿಕ ಆಚರಣೆಯನ್ನು ದರ್ಗಾದ ಸೂಫಿ ಪರಂಪರೆಯ ವಿಧಿ-ವಿಧಾನಗಳಿಗೆ ಅನುಗುಣವಾಗಿ ನಡೆಸಲ್ಪಟ್ಟಿದ್ದು, ಯಾವುದೇ ಮೆರವಣಿಗೆ ಅಥವಾ ಸ್ಥಳಗಳಲ್ಲಿ ಬದಲಾವಣೆಗಳಿಲ್ಲದೆ ಶಾಂತಿಯುತವಾಗಿ ಆಚರಿಸಲಾಯಿತು.

ರೋಟಿ ಭಾಜಿ ಫಾತಿಹಾದ ಅಂಗವಾಗಿ ದರ್ಗಾದ ಭಕ್ತರು ಮೊದಲು ದರ್ಗಾದ ಆವರಣದೊಳಗಿನ ಪೂರ್ವಜರ ಸಮಾಧಿಗಳ ದರ್ಶನ ಮಾಡಿದರು. ಪ್ರತೀ ಚೌಕಂಡಿಯಲ್ಲಿ ಸಲಾಂ ಮತ್ತು ಫಾತಿಹಾ ಪಠಿಸಲಾಯಿತು. ಬಳಿಕ ಅರಬಿ ಮತ್ತು ಪರ್ಷಿಯನ್ ಲಿಪಿಯ ತಾವೀಜುಗಳನ್ನು ಹೊಂದಿರುವ ಪವಿತ್ರ ಚೌಕಿಗಳ ದರ್ಶನ ಮಾಡಲಾಯಿತು. ಗುಹೆಯೊಳಗೆ ಪ್ರವೇಶಿಸಿದ ನಂತರ ಬೆಳ್ಳಿಯ ಬಾಗಿಲು ಬಳಿ ಪವಿತ್ರ ಗಾದಿ ಮತ್ತು ಚಿಲ್ಲಾ (ಪೀಠ) ಹಾಗೂ ಪಾದುಕೆಗಳ ದರ್ಶನ ಮಾಡಲಾಯಿತು.

ನಂತರ ಮಾಮಾ ಜಿಗ್ನಿ ಚಿಲ್ಲಾ ಮತ್ತು ಗಾದಿ (ಪೀಠ)ಗೆ ಜಿಯಾರತ್ ಮಾಡಲಾಗಿದ್ದು, ಅಲ್ಲಿ ಪರಂಪರೆಯ ರೋಟಿ ಭಾಜಿ ಫಾತಿಹಾ ಪಠಿಸಲಾಯಿತು. ಗುಹೆಯೊಳಗಿನ ಪವಿತ್ರ ಚಂದನ ಮಣ್ಣು ಸ್ಥಳಕ್ಕೆ ಗೌರವಪೂರ್ವಕ ಜಿಯಾರತ್ ಮಾಡಲಾಯಿತು. ಗುಹೆಯ ಹೊರಗೆ, ನನ್ನ ಮಹಾಪಿತಾಮಹ ಸಯ್ಯದ್ ಹುಸೇನ್ ಶಾ ಖಾದ್ರಿ ಹಾಗೂ ಮಹಾ ಮಹಾಪಿತಾಮಹ ಸಯ್ಯದ್ ಬುಡನ್ ಶಾ ಖಾದ್ರಿ ಸಮಾಧಿಗಳಿಗೆ ಜಿಯಾರತ್ ಮಾಡಲಾಯಿತು. ಇಬ್ಬರೂ ಅತ್ತಿ ಮರದ ಚೌಕಂಡಿಯಲ್ಲಿ ಸಮಾಧಿಯಾಗಿದ್ದು, ಅಲ್ಲಿ ಸಲಾಂ ಮತ್ತು ಫಾತಿಹಾ ಪಠಿಸಲಾಯಿತು. ಹಳೆಯ, ಹಾನಿಗೊಳಗಾದ ಮಸೀದಿಗೂ ಗೌರವಪೂರ್ವಕವಾಗಿ ಜಿಯಾರತ್ ಮಾಡಲಾಯಿತು. ಹಿಂದಿರುಗುವಾಗ ಹಜರತ್ ಜಮಾಲುಲ್ಲಾ ಮಘ್ರಿಬಿ ಮತ್ತು ಮಶ್ರಿಕಿ ಅವರ ಎರಡು ಕಾಫಿ ಸಮಾಧಿಗಳಿಗೆ ಸಲಾಂ ಮತ್ತು ಫಾತಿಹಾ ಪಠಿಸಲಾಯಿತು. ನಂತರ ದರ್ಗಾ ಕಾರ್ಯಾಲಯದ ಹತ್ತಿರ ಭಕ್ತರಿಗೆ ಪವಿತ್ರ ರೋಟಿ ಭಾಜಿ ಹಂಚಲಾಯಿತು.

ಈ ವೇಳೆ ಬಾಬಾ ಬುಡನ್ ಶಾ ಖಾದ್ರಿ ವಂಶಸ್ಥರಾದ ಸೈಯದ್ ಫಕ್ರುದ್ದೀನ್ ಶಾ ಖಾದ್ರಿ, ಸೈಯದ್ ಸಕ್ಲೈನ್ ಪಾಶ ಖಾದ್ರಿ, ಅಂಜುಮನ್ ಇ ಇಸ್ಲಾಮಿಯ ಅಧ್ಯಕ್ಷ ಸಿರಾಜ್ ಖಾನ್, ಸೂಫಿ ಗುರುಗಳಾದ ತನ್ವೀರ್ ಅಹ್ಮದ್ ಖಾದ್ರಿ, ಅಬ್ದುಲ್ ಖದೀರ್‌ವಾಲ, ಕಾಂಗ್ರೆಸ್ ಮುಖಂಡರಾದ ಆರೀಫ್, ಮುಹಮ್ಮದ್ ಅತೀಖ್, ಮುಖಂಡರಾದ ಮುಸ್ತಪಾ ಆಲ್ದೂರು, ಬಾಬಾ ಬುಡನ್ ಹೋರಾಟ ಸಮಿತಿ ಮುಖಂಡರಾದ ಜಮೀಲ್ ಖಾನ್, ಸಮೀರ್‌ಖಾನ್, ಜುನೈದ್, ಶಾನ್ ಇ ಮಝರ್ ಕಮಿಟಿ ಸದಸ್ಯ ಜಿಯಾ ಹಾಗೂ ಇತರ ಭಕ್ತರು ಉಪಸ್ಥಿತರಿದ್ದರು.

Peaceful Roti Bhaji Fatiha at Ba Budan Dargah