ಅಜ್ಜಂಪುರದ ಇಲಿಗೆ ‘ಹಣದ ಮೋಹ’

ಚಿಕ್ಕಮಗಳೂರು : ತುಮಕೂರಿನಲ್ಲಿ ಇತ್ತೀಚೆಗೆ ಇಲಿಯೊಂದು ಚಿನ್ನದ ಆಭರಣಗಳನ್ನು ಎಗರಿಸಿ ಸುದ್ದಿಯಾಗಿದ್ದರೆ, ಇತ್ತ ಚಿಕ್ಕಮಗಳೂರಿನಲ್ಲಿ ಮತ್ತೊಂದು ಚಾಣಾಕ್ಷ ಇಲಿ ಒಂದು ಹೆಜ್ಜೆ ಮುಂದೆ ಹೋಗಿ ನೇರವಾಗಿ ಹಣವನ್ನೇ ಕದ್ದು ತನ್ನ ಸಾಮ್ರಾಜ್ಯ ನಿರ್ಮಿಸಿಕೊಂಡಿರುವುದು ಬೆಳಕಿಗೆ ಬಂದಿದೆ.

ಚಿಕ್ಕಮಗಳೂರು ಜಿಲ್ಲೆಯ ಅಜ್ಜಂಪುರ ಪಟ್ಟಣದ ‘ಜಮ್-ಜಮ್ ಚಿಕನ್ ಅಂಗಡಿ’ಯಲ್ಲಿ ಈ ಸ್ವಾರಸ್ಯಕರ ಘಟನೆ ನಡೆದಿದೆ. ಅಂಗಡಿಯ ಮಾಲೀಕರಾದ ಸಿದ್ದಿಕ್ ಅವರು ಪ್ರತಿದಿನ ವ್ಯಾಪಾರ ಮುಗಿಸಿ ಗಲ್ಲಾಪೆಟ್ಟಿಗೆಯಲ್ಲಿ ಇಡುತ್ತಿದ್ದ 10, 20 ಮತ್ತು 50 ರೂಪಾಯಿ ನೋಟುಗಳು ಆಗಾಗ್ಗೆ ಮಂಗಮಾಯವಾಗುತ್ತಿದ್ದವು.

ಸಣ್ಣಪುಟ್ಟ ಮೌಲ್ಯದ ನೋಟುಗಳಾಗಿದ್ದರಿಂದ ಆರಂಭದಲ್ಲಿ ಅವರು ಅಷ್ಟಾಗಿ ತಲೆಕೆಡಿಸಿಕೊಂಡಿರಲಿಲ್ಲ. ಆದರೆ ದಿನಗಳು ಕಳೆದಂತೆ ನೋಟುಗಳು ನಾಪತ್ತೆಯಾಗುವುದು ಹೆಚ್ಚಾದಾಗ, ಯಾರೋ ಕಳ್ಳರು ಅಂಗಡಿಗೆ ಕನ್ನ ಹಾಕುತ್ತಿದ್ದಾರೆ ಎಂಬ ಅನುಮಾನ ಮಾಲೀಕರಿಗೆ ಬಲವಾಗಿದೆ.

ಅನುಮಾನಗೊಂಡ ಮಾಲೀಕ ಸಿದ್ದಿಕ್ ಅವರು ಅಂಗಡಿಯ ಮೂಲೆ ಮೂಲೆಗಳನ್ನು ಕೂಲಂಕುಷವಾಗಿ ಪರಿಶೀಲಿಸಿದಾಗ ಅಸಲಿ ಕಳ್ಳನ ಚೇಷ್ಟೆ ಬಯಲಾಗಿದೆ. ಅಂಗಡಿಯ ಮೂಲೆಯಲ್ಲಿದ್ದ ಪ್ಲಾಸ್ಟಿಕ್ ಕವರ್ ಒಂದನ್ನು ತೆರೆದು ಪರಿಶೀಲಿಸಿದಾಗ ಅಲ್ಲಿ ಇಲಿಯೊಂದು ರಾಜಗಾಂಭೀರ್ಯದಲ್ಲಿ ಬೆಚ್ಚಗೆ ಕುಳಿತಿರುವುದು ಕಂಡುಬಂದಿದೆ.

ಅಷ್ಟೇ ಅಲ್ಲ, ಆ ಇಲಿ ತಾನು ವಾಸಿಸಲು ಬರಿ ಹುಲ್ಲು-ಕಡ್ಡಿಗಳನ್ನು ಬಳಸದೆ, ಗಲ್ಲಾಪೆಟ್ಟಿಗೆಯಿಂದ ಕದ್ದು ತಂದ ನೋಟುಗಳನ್ನೇ ಹಾಸಿಗೆ ಹಾಗೂ ಹೊದಿಕೆಯನ್ನಾಗಿ ಮಾಡಿಕೊಂಡು ರಾಯಲ್ ಆಗಿ ಗೂಡು ಕಟ್ಟಿರುವುದು ಪತ್ತೆಯಾಗಿದೆ.

ಇಲಿಯ ಈ ವಿಶೇಷವಾದ ‘ಹಣದ ಮೋಹ’ ಮತ್ತು ಶಿಸ್ತಿನ ಕಳ್ಳತನವನ್ನು ಕಂಡು ಮಾಲೀಕ ಸಿದ್ದಿಕ್ ಅಚ್ಚರಿಯಿಂದ ದಂಗಾಗಿದ್ದಾರೆ. ಹಣವನ್ನು ಗಲ್ಲಾಪೆಟ್ಟಿಗೆಯಲ್ಲಿ ಭದ್ರವಾಗಿಟ್ಟರೂ ಇಲಿಯಿಟ್ಟ ಕನ್ನಕ್ಕೆ ಸಿದ್ದಿಕ್ ಅವರ ಹಣ ಈಗ ನೋಟಿನ ಗೂಡಾಗಿ ಪರಿವರ್ತನೆಯಾಗಿದ್ದು, ಈ ‘ಶ್ರೀಮಂತ ಇಲಿ’ಯ ಕಥೆ ಹಾಗೂ ವಿಡಿಯೋ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಸಖತ್ ವೈರಲ್ ಆಗಿದೆ.

Ajjampura’s rat ‘loves money’