ವೃದ್ಧಾಪ್ಯ ವೇತನದ ಹಣ ಪಡೆಯಲು ಆಧಾರ್ ಕಾರ್ಡ್ ಕೇಳಿದ ತಂದೆ ಹತ್ಯೆ

ತರೀಕೆರೆ: ವೃದ್ಧಾಪ್ಯ ವೇತನದ ಹಣ ಪಡೆಯಲು ಆಧಾರ್‌ ಕಾರ್ಡ್ ನೀಡುವಂತೆ ತಂದೆಯನ್ನು ಒತ್ತಾಯಿಸಿ ಜಗಳವಾಡಿದ ಮಗ, ತಂದೆಯನ್ನೇ ಮುದ್ದೆಕೋಲಿನಿಂದ ಹೊಡೆದು ಹತ್ಯೆ ಮಾಡಿರುವ ಘಟನೆ ತರೀಕೆರೆ ತಾಲೂಕಿನ ಕೂಡ್ಲೂರು ಗ್ರಾಮದಲ್ಲಿ ನಡೆದಿದೆ.

ಮೃತರನ್ನು ಕೂಡ್ಲೂರು ಗ್ರಾಮದ ಲೋಕೇಶಪ್ಪ ಎಂದು ಗುರುತಿಸಲಾಗಿದೆ. ಅವರ ಪುತ್ರ ರಮೇಶ ಹತ್ಯೆ ಆರೋಪ ಎದುರಿಸುತ್ತಿರುವ ವ್ಯಕ್ತಿಯಾಗಿದ್ದಾನೆ.

ಘಟನೆ ವಿವರದಂತೆ, ಲೋಕೇಶಪ್ಪ ಅವರ ಪತ್ನಿ ರತ್ನಮ್ಮ ಅನಾರೋಗ್ಯದಿಂದ ಮೃತಪಟ್ಟಿದ್ದು, ದಂಪತಿಗೆ ನಾಗರಾಜ, ಪುಷ್ಪಾವತಿ ಹಾಗೂ ರಮೇಶ ಎಂಬ ಮೂವರು ಮಕ್ಕಳಿದ್ದಾರೆ. ನಾಗರಾಜ ಸುಮಾರು 20 ವರ್ಷಗಳ ಹಿಂದೆ ಮನೆ ಬಿಟ್ಟು ಹೋಗಿದ್ದು, ಅವರ whereabouts ಬಗ್ಗೆ ಕುಟುಂಬಕ್ಕೆ ಮಾಹಿತಿ ಇಲ್ಲ ಎನ್ನಲಾಗಿದೆ. ಪುಷ್ಪಾವತಿ ಬುದ್ಧಿಮಾಂದ್ಯರಾಗಿದ್ದು, ರಮೇಶ ತಂದೆ ಲೋಕೇಶಪ್ಪ ಅವರೊಂದಿಗೆ ಕೂಡ್ಲೂರಿನಲ್ಲಿ ವಾಸವಿದ್ದು ಕೂಲಿ ಕೆಲಸ ಮಾಡಿಕೊಂಡಿದ್ದನು.

ರತ್ನಮ್ಮ ಮೃತಪಟ್ಟ ಬಳಿಕ ವೃದ್ಧಾಪ್ಯ ವೇತನದ ಹಣ ಪಡೆಯಲು ಆಧಾರ್‌ ಕಾರ್ಡ್ ನೀಡುವಂತೆ ರಮೇಶ ತನ್ನ ತಂದೆ ಲೋಕೇಶಪ್ಪ ಅವರೊಂದಿಗೆ ಪದೇಪದೇ ಜಗಳವಾಡುತ್ತಿದ್ದ ಎನ್ನಲಾಗಿದೆ. ಈ ವಿಚಾರದಲ್ಲಿ ಗಲಾಟೆ ಮಾಡದಂತೆ ಕುಟುಂಬದವರು ರಮೇಶನಿಗೆ ಬುದ್ಧಿವಾದ ಹೇಳಿದ್ದರು.

ಅ.3ರಂದು ರಾತ್ರಿ 11 ಗಂಟೆ ಸುಮಾರಿಗೆ ಆಧಾರ್‌ ಕಾರ್ಡ್ ವಿಚಾರವಾಗಿ ರಮೇಶ ಮತ್ತೆ ತಂದೆಯೊಂದಿಗೆ ಜಗಳ ತೆಗೆದುಕೊಂಡಿದ್ದಾನೆ. ಈ ವೇಳೆ ಮುದ್ದೆಕೋಲಿನಿಂದ ಲೋಕೇಶಪ್ಪ ಅವರ ತಲೆ, ಕೈ, ಕಿವಿ ಹಾಗೂ ಎದೆ ಭಾಗಕ್ಕೆ ಹೊಡೆದಿದ್ದು, ತೀವ್ರವಾಗಿ ಗಾಯಗೊಂಡ ಲೋಕೇಶಪ್ಪ ಮೃತಪಟ್ಟಿದ್ದಾರೆ ಎಂದು ದೂರಿನಲ್ಲಿ ಆರೋಪಿಸಲಾಗಿದೆ.

ಅ.4ರಂದು ಬೆಳಗ್ಗೆ ಸಂಬಂಧಿಕ ಓಂಕಾರಪ್ಪ ಅವರು ಮೃತರ ಸಂಬಂಧಿ ಶ್ರೀನಿವಾಸ್ ಅವರಿಗೆ ಕರೆ ಮಾಡಿ ಘಟನೆ ಬಗ್ಗೆ ಮಾಹಿತಿ ನೀಡಿದ್ದಾರೆ. ತಕ್ಷಣ ಸ್ಥಳಕ್ಕೆ ತೆರಳಿದ ಶ್ರೀನಿವಾಸ್, ಮನೆಯ ಅಡುಗೆಮನೆ ಸಮೀಪ ಹಾಸಿಗೆ ಮೇಲೆ ಲೋಕೇಶಪ್ಪ ಮೃತಪಟ್ಟಿರುವುದನ್ನು ಕಂಡಿದ್ದಾರೆ. ಅವರ ದೇಹದ ವಿವಿಧ ಭಾಗಗಳಲ್ಲಿ ಗಾಯಗಳಾಗಿದ್ದು ರಕ್ತಸ್ರಾವವಾಗಿತ್ತು ಎಂದು ದೂರಿನಲ್ಲಿ ತಿಳಿಸಿದ್ದಾರೆ.

ಈ ಸಂಬಂಧ ಶ್ರೀನಿವಾಸ್ ಅವರು ಬೀರೂರು ಪೊಲೀಸ್ ಠಾಣೆಗೆ ದೂರು ನೀಡಿದ್ದು, ಠಾಣಾ ಮೊ.ನಂ.154/2026, ಭಾರತೀಯ ನ್ಯಾಯ ಸಂಹಿತೆ (BNS) ಕಲಂ 103(1) ಅಡಿಯಲ್ಲಿ ಪ್ರಕರಣ ದಾಖಲಾಗಿದೆ. ಆರೋಪಿಯ ವಿರುದ್ಧ ಪೊಲೀಸರು ತನಿಖೆ ಕೈಗೊಂಡಿದ್ದಾರೆ.

Father murdered after asking for Aadhaar card to collect old-age pension money.