ಸಬ್ಸಿಡಿ ಕೊಡಿಸುವುದಾಗಿ ನಂಬಿಸಿ 80 ರೈತರಿಗೆ ವಂಚನೆ

ಕಡೂರು : ಸರಕಾರದ ವಿವಿಧ ಇಲಾಖೆಗಳಡಿ ದೊರೆಯುವ ಸಬ್ಸಿಡಿ ಸವಲತ್ತುಗಳನ್ನು ಕೊಡಿಸುವುದಾಗಿ ನಂಬಿಸಿ ೮೦ ಜನ ರೈತರಿಂದ ೧.೩೪ ಕೋಟಿಗೂ ಹೆಚ್ಚು ಹಣವನ್ನು ವಂಚಿಸಿರುವ ಪ್ರಕರಣವೊಂದು ಬೆಳಕಿಗೆ ಬಂದಿದೆ.

ಬೆಂಗಳೂರಿನ ಕೆ. ಗಂಗಾಧರಗೌಡ ಎಂಬಾತ ವ್ಯಕ್ತಿಯು ರೈತರಿಂದ ವಂಚಿತ ಆರೋಪಿಯಾಗಿದ್ದು. ಕಳೆದ ೨೦೨೪ರ ಜೂನ್‌ನಲ್ಲಿ ವಿಧಾನಸೌಧದ ಬಳಿಯ ಪರಿಚಯವಾಗಿದ್ದ ಕೆ.ಗಂಗಾಧರಗೌಡ ಎಂಬಾತನು ರೈತರುಗಳಿಗೆ ಸರ್ಕಾರದ ಹೊಸ ಹೊಸ ಸ್ಕೀಮ್ ಗಳಲ್ಲಿ ಕೃಷಿ ಇಲಾಖೆ, ಪ್ರವಾಸೋದ್ಯಮ ಇಲಾಖೆ ಹಾಗೂ ಇನ್ನು ಇತರ ಇಲಾಖೆಗಳಿಂದ ಸಬ್ಸಿಡಿ ದರದಲ್ಲಿ ಸವಲತ್ತುಗಳನ್ನು ಕೊಡಿಸುತ್ತೇನೆಂದು, ರೈತರುಗಳು ೫೦ ಸಾವಿರ ಭರಿಸಿದರೆ, ಒಂದು ಟ್ರಾಕ್ಟರ್‌ಗೆ ೩ ಲಕ್ಷ ರೂಗಳ ಸಬ್ಸೀಡಿಯನ್ನು ಕೊಡಿಸುತ್ತೇನೆಂದು ನಂಬಿಸಿದ್ದು, ಇದನ್ನು ನಂಬಿ ಸ್ನೇಹಿತರಾದ ಕಲ್ಲೇಶ್ ಮತ್ತು ಚಂದ್ರಶೇಖರ್ ಮೂರು ಜನರು ಸೇರಿ ಒಟ್ಟು ಸುಮಾರು ೮೦ ಜನ ರೈತರಿಂದ ಪಡೆದಿದ್ದ ಒಟ್ಟು ೧,೩೪,೯೮,೪೦೦ ರೂ. ಹಣವನ್ನು ಗಂಗಾಧರ ಗೌಡಗೆ ಪಾವತಿಸಿದ್ದಾರೆ.

ಹಣ ಸಂದಾಯದ ದಾಖಲಾತಿಗಳನ್ನು ವಾಟ್ಸಾಪ್ ಮೂಲಕ ಕಳುಹಿಸಿದ್ದು ಹಾಗೂ ಇದೇ ರೀತಿ ಗಂಗಾಧರಗೌಡನು ಇತರೆ ರೈತರಿಂದಲೂ ಹಣ ಪಡೆದಿದದ್ದು,  ಇದುವರೆವಿಗೂ ಸರ್ಕಾರದ ಯಾವುದೇ ಸವಲತ್ತುಗಳನ್ನು ಮಾಡಿಸಿಕೊಡದ ಪರಿಣಾಮ ಅನುಮಾನಗೊಂಡು ಪದೇ ಪದೇ ಫೋನ್ ಕರೆ ಮಾಡಿ ವಿಚಾರಿಸಿದಾಗ ಬಜೆಟ್ ಅಧಿವೇಶನ, ಮತ್ತು ಬೆಳಗಾವಿಯ ಅಧಿವೇಶನ ಮುಗಿಯಲಿ, ಸಬ್ಡಿಡಿಗಾಗಿ ಸಲ್ಲಿಕೆಯಾಗಿರುವ ಅರ್ಜಿಗಳ ಕಡತಗಳು ವಿಲೇವಾರಿಗೊಂಡಿದ್ದು, ಶೀಘ್ರದಲ್ಲೇ ಸವಲತ್ತುಗಳು ದೊರೆಯುತ್ತದೆ ಎಂದು ಸಬೂಬು ಉತ್ತರ ಕೊಡುವ ಮೂಲಕ ನಂಬಿಸಿದ್ದಾನೆ.

ಬಳಿಕ ಯಾವುದೇ ಸಂಪರ್ಕಕ್ಕೆ ಸಿಗದ ಹಿನ್ನಲೆಯಲ್ಲಿ ತಾವು ಮೋಸಹೋಗಿರುವುದಾಗಿ ತಿಳಿದು ತಾಲ್ಲೂಕಿನ ವೈ.ಮಲ್ಲಾಪುರ ವಾಸಿ ಎಂ.ಬಿ. ಮಹೇಶ್ವರಪ್ಪ ಕೆ. ಗಂಗಾಧರಗೌಡ ವಿರುದ್ದ ದೂರು ದಾಖಲಿಸಿದ್ದಾರೆ. ಸಖರಾಯಪಟ್ಟಣ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

80 farmers cheated by promising subsidy