ಕೊಪ್ಪದಲ್ಲಿ ಸಿನಿಮಾ ಶೈಲಿಯಲ್ಲಿ ಯುವತಿ ನಾಪತ್ತೆ

ಕೊಪ್ಪ: ಪಿಯುಸಿ ಮುಗಿಸಿ ಕಂಪ್ಯೂಟರ್ ಕ್ಲಾಸಿಗೆ ಹೋಗುತ್ತಿದ್ದ ಯುವತಿಯೊಬ್ಬಳು ಸಿನಿಮಾ ಶೈಲಿಯಲ್ಲಿ ನಾಪತ್ತೆಯಾಗಿರುವ ಘಟನೆ ಕೊಪ್ಪ ತಾಲೂಕಿನ ಹರಿಹರಪುರ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ಬೆಳಕಿಗೆ ಬಂದಿದೆ. ಮೆಸ್ಕಾಂನಲ್ಲಿ ಕಾರ್ಯನಿರ್ವಹಿಸುತ್ತಿರುವ ಅಧಿಕಾರಿಯೊಬ್ಬರ ಪುತ್ರಿ ಈ ರೀತಿ ವಿಚಿತ್ರವಾಗಿ ನಾಪತ್ತೆಯಾದ ಯುವತಿ. ಭಾನುವಾರ ಬೆಳಿಗ್ಗೆ ಈ ಘಟನೆ ಬೆಳಕಿಗೆ ಬಂದಿದೆ.

ಜೂನ್ 13 ರ ಶನಿವಾರದಂದು ತಂದೆ-ಮಗಳು ಇಬ್ಬರೂ ಶೃಂಗೇರಿ ದೇವಸ್ಥಾನಕ್ಕೆ ಹೋಗಿ ದರ್ಶನ ಮುಗಿಸಿ ರಾತ್ರಿ ಮನೆಗೆ ಮರಳಿ ಒಟ್ಟಿಗೆ ಊಟ ಮಾಡಿ ಮಲಗಿದ್ದರು. ಮರುದಿನ ಬೆಳಿಗ್ಗೆ 7:30 ಆದರೂ ಮಗಳು ರೂಮ್‌ನಿಂದ ಹೊರಬರದಿದ್ದಾಗ ತಂದೆ ಮಗಳ ಕೋಣೆಗೆ ಹೋಗಿ ನೋಡಿದ್ದಾರೆ. ಆಗ ಮಗಳು ಬೆಡ್ ಶೀಟ್ ಹೊದ್ದು ಮಲಗಿರುವಂತೆ ಕಾಣಿಸಿದೆ.

ಆದರೆ, ಎಷ್ಟು ಕರೆದರೂ ಓಗೊಡದಿದ್ದಾಗ ಅನುಮಾನಗೊಂಡು ತಂದೆ ಬೆಡ್ ಶೀಟ್ ತೆಗೆದು ನೋಡಿದ್ದಾರೆ. ಅಲ್ಲಿ ಮಗಳ ಬದಲಿಗೆ ಒಂದು ದೊಡ್ಡ ಗೊಂಬೆಯನ್ನು ಮಲಗಿಸಿ, ಅದರ ಮೇಲೆ ಬೆಡ್ ಶೀಟ್ ಹೊದಿಸಿ ನಾಪತ್ತೆಯಾಗಿರುವ ಆಘಾತಕಾರಿ ದೃಶ್ಯ ಕಂಡುಬಂದಿದೆ.

ಮನೆಯಿಂದ ಹೊರಡುವಾಗ ತಂದೆಗೆ ಅನುಮಾನ ಬಾರದಿರಲಿ ಎಂದು ಯುವತಿ ಈ ಚಾಣಾಕ್ಷ ಪ್ಲಾನ್ ಮಾಡಿದ್ದಾಳೆ ಎನ್ನಲಾಗಿದೆ. ಎಂಟು ವರ್ಷಗಳ ಹಿಂದೆಯೇ ತಾಯಿಯನ್ನು ಕಳೆದುಕೊಂಡಿದ್ದ ಮಗಳನ್ನು ತಂದೆ ಅತ್ಯಂತ ಮುದ್ದಾಗಿ ಸಾಕಿದ್ದರು. ಆಕೆಗೆ ಪೋಷಕರು ಮೊಬೈಲ್ ಕೊಡಿಸಿರಲಿಲ್ಲ. ಆದರೆ, ಇತ್ತೀಚೆಗೆ ಆಕೆಯ ಬಳಿ ಒಂದು ರಹಸ್ಯ ಮೊಬೈಲ್ ಫೋನ್ ಇರುವುದು ತಂದೆಯ ಗಮನಕ್ಕೆ ಬಂದಿತ್ತು.

ಅದರ ಬಗ್ಗೆ ವಿಚಾರಿಸಿದಾಗ ಆಕೆ ಯಾರ ಫೋನ್ ಎಂದು ಹೇಳುತ್ತಿರಲಿಲ್ಲ ಹಾಗೂ ನಂಬರ್ ಕೂಡ ನೀಡದೆ ಮುಚ್ಚಿಟ್ಟಿದ್ದಳು ಎನ್ನಲಾಗಿದೆ. ಇದೀಗ ಆಕೆ ಅದೇ ಮೊಬೈಲ್ ಮೂಲಕ ಯಾರನ್ನೋ ಸಂಪರ್ಕಿಸಿ, ಮುಂಚಿತವಾಗಿಯೇ ಸ್ಕೆಚ್ ಹಾಕಿ ಮನೆಯಿಂದ ಹೊರಟು ಹೋಗಿದ್ದಾಳೆ ಎಂಬ ಅನುಮಾನ ವ್ಯಕ್ತವಾಗಿದೆ. ಬೆಂಗಳೂರಿನಲ್ಲಿದ್ದ ಮಗ ಊರಿಗೆ ಬಂದ ನಂತರ, ತಂದೆ ಹರಿಹರಪುರ ಪೊಲೀಸ್ ಠಾಣೆಗೆ ಹಾಜರಾಗಿ ದೂರು ನೀಡಿದ್ದು, ಪೊಲೀಸರು ಯುವತಿಯ ಪತ್ತೆಗಾಗಿ ತನಿಖೆ ಚುರುಕುಗೊಳಿಸಿದ್ದಾರೆ.

Young woman goes missing in Koppa in a cinema-style setting