ವ್ಯಸನಮುಕ್ತ ಸಮಾಜ ನಿರ್ಮಾಣಕ್ಕೆ ಸಂಯಮವೇ ಅಸ್ತ್ರ

ಚಿಕ್ಕಮಗಳೂರು : ಯುವಜನರು ಮಾದಕವಸ್ತು ಹಾಗೂ ಇತರ ದುಶ್ಚಟಗಳಿಂದ ದೂರವಿದ್ದು, ಸಂಯಮ ಮತ್ತು ಶಿಸ್ತಿನ ಜೀವನವನ್ನು ಅಳವಡಿಸಿಕೊಳ್ಳುವ ಮೂಲಕ ವ್ಯಸನಮುಕ್ತ ಸಮಾಜ ನಿರ್ಮಾಣಕ್ಕೆ ಕೈಜೋಡಿಸಬೇಕು ಎಂದು ಜಿಲ್ಲಾಧಿಕಾರಿ ಭವಂರ್ ಸಿಂಗ್ ಮೀನಾ ಕರೆ ನೀಡಿದರು.

ನಗರದ ತೇರಾಪಂಥ್ ಭವನದಲ್ಲಿ ಅನುವ್ರತ ಸಮಿತಿ ವತಿಯಿಂದ ಆಚಾರ್ಯ ಮಹಾಶ್ರಮಣ ಜಿ ಹಾಗೂ ಸಾಧ್ವಿ ಶ್ರೀ ಪುಣ್ಯಯಶ್ ಜಿ ಅವರ ಆಧ್ಯಾತ್ಮಿಕ ಮಾರ್ಗದರ್ಶನದಲ್ಲಿ ಆಯೋಜಿಸಿದ್ದ ‘ವ್ಯಸನಮುಕ್ತ ಅಭಿಯಾನ’ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿ ಭಾರತ ಸರ್ಕಾರದ ‘ನಶಾ ಮುಕ್ತ ಭಾರತ’ ಅಭಿಯಾನಕ್ಕೆ ಪೂರಕವಾಗಿ ಇಂತಹ ಕಾರ್ಯಕ್ರಮಗಳನ್ನು ಆಯೋಜಿಸಲಾಗುತ್ತಿರುವುದು ಶ್ಲಾಘನೀಯ. ವ್ಯಸನಕ್ಕೆ ಒಳಗಾದ ಬಳಿಕ ಅದನ್ನು ತ್ಯಜಿಸುವುದಕ್ಕಿಂತ, ಆರಂಭದಿಂದಲೇ ಸಂಯಮದ ಜೀವನ ನಡೆಸುವುದು ಅತ್ಯಂತ ಪರಿಣಾಮಕಾರಿ ಮಾರ್ಗವಾಗಿದೆ ಎಂದರು.

ಪ್ರಾರ್ಥನೆಯಲ್ಲಿ ಪ್ರತಿಪಾದಿಸಲಾದ ‘ಸಂಯಮ’ದ ಸಂದೇಶವನ್ನು ಯುವಜನರಿಗೆ ತಲುಪಿಸುವ ಅಗತ್ಯವಿದೆ. ಕಾಲೇಜು ಹಾಗೂ ಸಾಮಾಜಿಕ ಜೀವನದಲ್ಲಿ ಯುವಕರನ್ನು ಹಲವು ರೀತಿಯ ಪ್ರಲೋಭನೆಗಳು ಆಕರ್ಷಿಸುವ ಸಾಧ್ಯತೆ ಇರುವುದರಿಂದ, ಸ್ವಯಂ ನಿಯಂತ್ರಣ, ಶಿಸ್ತು ಮತ್ತು ಉತ್ತಮ ಮೌಲ್ಯಗಳ ಮೂಲಕ ಅವುಗಳನ್ನು ಎದುರಿಸಬೇಕು ಎಂದು ಹೇಳಿದರು.

ಅನುವ್ರತ ಸಮಿತಿಯ ಅಧ್ಯಕ್ಷೆ ಮಂಜುಬಾಯಿ ಬನ್ಸಾಲಿ, ತೇರಾಪಂಥ್ ಸಭೆಯ ಅಧ್ಯಕ್ಷ ಮಹೇಂದ್ರ ಡೋಷಿ, ಗೌತಮ್ ಆಚಾ ಸೇರಿದಂತೆ ಕಾರ್ಯಕ್ರಮದ ಆಯೋಜಕರಿಗೆ ಅಭಿನಂದನೆ ಸಲ್ಲಿಸಿದ ಜಿಲ್ಲಾಧಿಕಾರಿ, ನಿಸ್ವಾರ್ಥ ಸೇವೆ ಹಾಗೂ ಮೂಲ ಮೌಲ್ಯಗಳನ್ನು ಜೀವನದಲ್ಲಿ ಅಳವಡಿಸಿಕೊಳ್ಳುವ ಸಂದೇಶ ಇಂತಹ ಕಾರ್ಯಕ್ರಮಗಳಿಂದ ಸಮಾಜಕ್ಕೆ ದೊರೆಯುತ್ತದೆ ಎಂದರು.

ಕಾರ್ಯಕ್ರಮದಲ್ಲಿ ನಗರಸಭೆ ಸದಸ್ಯ ವಿಪುಲ್ ಕುಮಾರ್ ಜೈನ್, ತೇರಾಪಂಥ ಸಭೆಯ ಪದಂ ನಾಹರ್, ಅಣುವ್ರತ ಸಮಿತಿಯ ಗೌತಮ್‌ಜಿ ಆಚ್ಚಾ, ಟಿಪಿಎಫ್ ಅಧ್ಯಕ್ಷ ಅಭಿಷೆಕ್ ಆಚ್ಚಾ, ತೇರಾಪಂಥ ಟ್ರಸ್ಟ್ ಅಧ್ಯಕ್ಷ ಅಶೋಕ್‌ಜಿ ಡೋಸಿ, ಮಾಜಿ ಅಧ್ಯಕ್ಷ ತಾರಾಚಂದ್ ಸೇಠಿಯಾ, ಯುವ ಪರಿಷತ್ ಅಧ್ಯಕ್ಷ ಹಿತೇಶ್ ಜಿ. ಗಾದಿಯಾ, ಮದನ್‌ಚಂದ್ ಗಾದಿಯಾ, ಮಹಿಳಾ ಮಂಡಲದ ಅಧ್ಯಕ್ಷೆ ಸಂತೋ? ಬಾಯಿ ಗಾದಿಯಾ, ನರಿತಾ ಗಾದಿಯಾ, ಸೇರಿದಂತೆ ಅನೇಕ ಗಣ್ಯರು ಹಾಗೂ ಸಮಾಜದ ಬಂಧುಗಳು ಉಪಸ್ಥಿತರಿದ್ದರು. ಕಾರ್ಯಕ್ರಮಕ್ಕು ಮೊದಲು ತಾಲ್ಲೂಕು ಕಛೇರಿಯಿಂದ ತೇರಾಪಂಥ್ ಸಭಾವರೆಗೆ ವ್ಯಸನಮುಕ್ತ ಮೆರವಣಿಗೆ ನೆಡೆಸಿದರು.

Restraint is the weapon for building an addiction-free society.