ಬಿದರೆ ಗ್ರಾಮದ ಕೋಳಿ ಗೂಡಿನಲ್ಲಿ ಮೂರು ನಾಗರಹಾವು ಪತ್ತೆ

ಚಿಕ್ಕಮಗಳೂರು: ಅತಿಯಾದ ಬಿಸಿಲಿನ ಬೇಗೆಯಿಂದ ತಪ್ಪಿಸಿಕೊಳ್ಳಲು ಹಾಗೂ ಆಹಾರದ ಹುಡುಕಾಟದಲ್ಲಿದ್ದ ಮೂರು ನಾಗರ ಹಾವುಗಳು ಒಂದೇ ಗ್ರಾಮದ ಮೂರು ಮನೆಗಳ ಕೋಳಿ ಗೂಡು ಸೇರಿ ಅಚ್ಚರಿ ಮೂಡಿಸಿದ ಘಟನೆ ಚಿಕ್ಕಮಗಳೂರು ತಾಲೂಕಿನ ಬಿದರೆ ಗ್ರಾಮದಲ್ಲಿ ನಡೆದಿದೆ.

ಗ್ರಾಮದ ನಿವಾಸಿಗಳಾದ ರಾಮೇಗೌಡ, ದೇವರಾಜೇಗೌಡ ಮತ್ತು ನಾಗರತ್ನ ಎಂಬುವವರ ಮನೆಯ ಕೋಳಿ ಗೂಡುಗಳಿಗೆ ಈ ನಾಗರ ಹಾವುಗಳು ನುಗ್ಗಿದ್ದವು. ಅತಿಯಾದ ಬಿಸಿಲಿನಿಂದ ತಂಪು ಆಶ್ರಯ ಹುಡುಕುತ್ತಾ ಬಂದಿದ್ದ ಹಾವುಗಳು, ಮೊಟ್ಟೆಗಳನ್ನು ನುಂಗುವ ಆಸೆಯಿಂದ ಗೂಡಿನೊಳಗೆ ಸೇರಿಕೊಂಡಿದ್ದವು. ಈ ಪೈಕಿ ಒಂದು ಹಾವು ಬರೋಬ್ಬರಿ 21 ಮೊಟ್ಟೆಗಳನ್ನು ನುಂಗಿತ್ತು! ಮೊಟ್ಟೆಗಳನ್ನು ನುಂಗಿದ ನಂತರ ಹಾವುಗಳು ಭಾರದಿಂದಾಗಿ ಹೊರಬರಲಾಗದೆ ಗೂಡಿನಲ್ಲೇ ಸಿಲುಕಿಕೊಂಡಿದ್ದವು.

ಹಾವುಗಳನ್ನು ಕಂಡು ಆತಂಕಕ್ಕೊಳಗಾದ ಸ್ಥಳೀಯರು ಕೂಡಲೇ ಬಾಳೆಹೊನ್ನೂರಿನ ಖ್ಯಾತ ಉರಗ ತಜ್ಞ ಆಲ್ಬರ್ಟ್ ಅವರಿಗೆ ಮಾಹಿತಿ ನೀಡಿದರು. ತಕ್ಷಣ ಸ್ಥಳಕ್ಕೆ ಧಾವಿಸಿದ ಆಲ್ಬರ್ಟ್, ಮೂರೂ ನಾಗರ ಹಾವುಗಳನ್ನು ಯಾವುದೇ ಅಪಾಯವಿಲ್ಲದಂತೆ ಸುರಕ್ಷಿತವಾಗಿ ರಕ್ಷಿಸಿದರು. ಬಳಿಕ ಅವುಗಳನ್ನು ಎಲೆಕಲ್ಲು ಸಮೀಪದ ಅರಣ್ಯ ಪ್ರದೇಶಕ್ಕೆ ಬಿಡಲಾಗಿದೆ.

ಒಂದೇ ಗ್ರಾಮದ ಮೂರು ಮನೆಗಳಲ್ಲಿ ಏಕಕಾಲಕ್ಕೆ ನಾಗರಹಾವುಗಳು ಕಾಣಿಸಿಕೊಂಡ ಈ ಅಪರೂಪದ ಘಟನೆಯನ್ನು ನೋಡಲು ಗ್ರಾಮಸ್ಥರು ಹೆಚ್ಚಿನ ಸಂಖ್ಯೆಯಲ್ಲಿ ಜಮಾಯಿಸಿದ್ದರು.

Three cobras found in a chicken coop in Bidde village