ಮೂಡಿಗೆರೆ: ಸಾಮಾಜಿಕ ಜಾಲತಾಣ ಫೇಸ್‌ಬುಕ್‌ನಲ್ಲಿ ಕಂಡ ಆಕರ್ಷಕ ಜಾಹೀರಾತನ್ನು ನಂಬಿ ವಸ್ತುಗಳನ್ನು ಖರೀದಿಸಲು ಮುಂದಾದ ಮೂಡಿಗೆರೆಯ ರಿಯಲ್ ಎಸ್ಟೇಟ್ ಉದ್ಯಮಿಯೊಬ್ಬರು ಹಂತ-ಹಂತವಾಗಿ ಬರೊಬ್ಬರಿ 2 ಲಕ್ಷ ರೂಪಾಯಿ ಕಳೆದುಕೊಂಡು ಸೈಬರ್ ವಂಚಕರ ಬಲೆಗೆ ಬಿದ್ದಿರುವ ಘಟನೆ ಬೆಳಕಿಗೆ ಬಂದಿದೆ.
ಮೂಡಿಗೆರೆ ಪಟ್ಟಣದ ಕುಮಾರ್ ಲೇಔಟ್ ನಿವಾಸಿ ತಮ್ಮ ಮೊಬೈಲ್‌ನಲ್ಲಿ ಫೇಸ್ಬುಕ್ ಜಾಲಾಡುತ್ತಿದ್ದ ವೇಳೆ ಕಣ್ಣಿಗೆ ಬಿದ್ದ ಆನ್‌ಲೈನ್ ಮಾರಾಟದ ಜಾಹೀರಾತನ್ನು ನಂಬಿ, ‘ಶಿಲ್ಪಾ ಅರುಣ್’ ಎಂಬ ಫೇಸ್ಬುಕ್ ಖಾತೆಯೊಂದಿಗೆ ಚಾಟ್ ನಡೆಸಿದ್ದರು.
ವಸ್ತುಗಳನ್ನು ಕಳುಹಿಸಿಕೊಡುವ ಭರವಸೆ ನೀಡಿದ ಅಪರಿಚಿತ ವ್ಯಕ್ತಿಗಳು, ಇವರಿಂದ ವಿಳಾಸ ಪಡೆದು ವಿವಿಧ ಕಂತುಗಳಲ್ಲಿ ಸೆಂಟ್ರಲ್ ಬ್ಯಾಂಕ್ ಆಫ್ ಇಂಡಿಯಾ ಹಾಗೂ ಬ್ಯಾಂಕ್ ಆಫ್ ಇಂಡಿಯಾದ ಖಾತೆಗಳಿಗೆ ಫೋನ್ ಮೂಲಕ ಒಟ್ಟು 2,00,000 ರೂಪಾಯಿಗಳನ್ನು ವರ್ಗಾವಣೆ ಮಾಡಿಸಿಕೊಂಡಿದ್ದಾರೆ.
ಹಣ ಪಡೆದ ಬಳಿಕ ವಸ್ತುಗಳನ್ನು ಕಳುಹಿಸದೆ ದಿನ ದೂಡುತ್ತಾ ಬಂದ ಖದೀಮರು, ಕೊನೆಗೆ ಫೇಸ್ಬುಕ್ ಚಾಟ್ ಹಿಸ್ಮರಿ ಹಾಗೂ ಪ್ರೊಫೈಲ್ ಸಂಪರ್ಕವನ್ನೇ ರದ್ದುಗೊಳಿಸಿ ಸಂಪರ್ಕಕ್ಕೆ ಸಿಗದಂತೆ ಪರಾರಿಯಾಗಿದ್ದಾರೆ. ತಾವು ಮೋಸ ಹೋಗಿರುವುದು ತಡವಾಗಿ ಅರಿವಿಗೆ ಬರುತ್ತಿದ್ದಂತೆ ನೊಂದ ಉದ್ಯಮಿ ಸೈಬರ್ ಸಹಾಯವಾಣಿ 1930 ಗೆ ಕರೆ ಮಾಡಿ ದೂರು ದಾಖಲಿಸಿದ್ದು, ಬಳಿಕ ಚಿಕ್ಕಮಗಳೂರು ಸಿಇಎನ್ (ಸೈಬರ್ ಕ್ರೈಂ) ಪೊಲೀಸ್ ಠಾಣೆಗೆ ಹಾಜರಾಗಿ ವಂಚಕರ ವಿರುದ್ಧ ಸೂಕ್ತ ಕಾನೂನು ಕ್ರಮ ಕೈಗೊಂಡು ಹಣ ವಾಪಸ್ ಕೊಡಿಸುವಂತೆ ಲಿಖಿತ ದೂರು ಸಲ್ಲಿಸಿದ್ದಾರೆ.
A real estate businessman who lost 2 lakh rupees by trusting a Facebook ad
Leave a comment