ಕೊಪ್ಪ ತಾಲ್ಲೂಕಿನಲ್ಲಿ ಕಾಡುಕೋಣಗಳ ಉಪಟಳ

ಕೊಪ್ಪ: ಕಾಡುಕೋಣಗಳ ಉಪಟಳ ದಿನೇ ದಿನೇ ಮಿತಿ ಮೀರುತ್ತಿದ್ದು, ರಸ್ತೆಯಲ್ಲಿ ನಡೆದು ಹೋಗುತ್ತಿದ್ದ ವಲಸೆ ಕಾರ್ಮಿಕರ ಮೇಲೆ ಏಕಾಏಕಿ ಕಾಡುಕೋಣ ದಾಳಿಗೆ ಯತ್ನಿಸಿದ ಆತಂಕಕಾರಿ ಘಟನೆ ಕೊಪ್ಪ ಅರಣ್ಯ ವಲಯ ವ್ಯಾಪ್ತಿಯ ಹೆಗ್ಗಾರುಕುಡಿಗೆ ಸಮೀಪದ ನಡೆದಿದೆ.

ರಸ್ತೆಯಲ್ಲಿ ನಡೆದುಕೊಂಡು ಬರುತ್ತಿದ್ದ ಇಬ್ಬರು ವಲಸೆ ಕಾರ್ಮಿಕರನ್ನು ಕಂಡೊಡನೆ ಕಾಡುಕೋಣ ಹಿಂಡು ಆಕ್ರಮಣಕಾರಿಯಾಗಿ ಓಡಿಸಿಕೊಂಡು ಬಂದಿದೆ. ಪ್ರಾಣಾಪಾಯದ ಸುಳಿವು ಅರಿತ ಕಾರ್ಮಿಕರು ಕ್ಷಣಾರ್ಧದಲ್ಲಿ ಪಕ್ಕದಲ್ಲೇ ಇದ್ದ ಮರವನ್ನು ಏರಿ ತಮ್ಮ ಪ್ರಾಣ ಉಳಿಸಿಕೊಂಡಿದ್ದಾರೆ.

ಕಾರ್ಮಿಕರು ಮರ ಏರುತ್ತಿದ್ದಂತೆ ತೀವು ಆಕ್ರೋಶಗೊಂಡ ಕಾಡುಕೋಣವೊಂದು ಮಣ್ಣಿನ ಗುಡ್ಡೆಗೆ ಗುದ್ದಿ ತನ್ನ ಆರ್ಭಟ ತೋರಿದೆ. ಮರವೇರಿದರೂ ಕಾರ್ಮಿಕರ ಬೆನ್ನು ಬಿಡದ ಕಾಡುಕೋಣಗಳ ಹಿಂಡು, ಮರದ ಬುಡದಲ್ಲೇ ಸಾಕಷ್ಟು ಹೊತ್ತು ಬೀಡು ಬಿಟ್ಟಿದ್ದವು. ಈ ವೇಳೆ ಮರದ ಮೇಲಿಂದಲೇ ಜೀವಭಯದಲ್ಲಿ ನಡುಗುತ್ತಾ ಕಾರ್ಮಿಕನೊಬ್ಬ ಕಾಡುಕೋಣಗಳ ಆರ್ಭಟವನ್ನು ತಮ್ಮ ಮೊಬೈಲ್‌ನಲ್ಲಿ ವಿಡಿಯೋ ಮಾಡಿದ್ದಾರೆ.

ಇತ್ತೀಚಿನ ದಿನಗಳಲ್ಲಿ ಕೊಪ್ಪ ತಾಲೂಕಿನಲ್ಲಿ ಕಾಡುಕೋಣಗಳ ಹಾವಳಿ ವಿಪರೀತವಾಗಿ ಹೆಚ್ಚಾಗಿದ್ದು, ಎಸ್ಟೇಟ್ ಕಾರ್ಮಿಕರು ಹಾಗೂ ಸ್ಥಳೀಯರು ಪ್ರತಿದಿನ ಆತಂಕದಲ್ಲಿಯೇ ಜೀವ ಕೈಯಲ್ಲಿ ಹಿಡಿದುಕೊಂಡೇ ಓಡಾಡುವಂತಹ ಪರಿಸ್ಥಿತಿ ನಿರ್ಮಾಣವಾಗಿದೆ.

Menace of wild bison in Koppa taluk