ತರೀಕೆರೆಯ ಆಫ್ರಿನ್‌ಗೆ ಇಂಜಿನಿಯರಿಂಗ್‌ನಲ್ಲಿ ರಾಜ್ಯಕ್ಕೆ ಮೂರನೇ ರ‍್ಯಾಂಕ್

ತರೀಕೆರೆ: ಸಾಧನೆಗೆ ಜಾತಿ, ಧರ್ಮ, ಭಾಷೆಯ ಹಂಗಿಲ್ಲ ಎಂಬುದನ್ನು ಸಾಬೀತುಪಡಿಸಿರುವ ತರೀಕೆರೆಯ ಪ್ರತಿಭಾವಂತೆ ನೈಯ್ಯರ್ ಫಾತೀಮಾ ಆಫ್ರಿನ್, ಇಂಜಿನಿಯರಿಂಗ್ ಪದವಿಯಲ್ಲಿ ರಾಜ್ಯಕ್ಕೆ ಮೂರನೇ ರ‍್ಯಾಂಕ್ ಪಡೆಯುವ ಮೂಲಕ ಕುಟುಂಬ ಹಾಗೂ ಪಟ್ಟಣಕ್ಕೆ ಕೀರ್ತಿ ತಂದಿದ್ದಾರೆ.

ತರೀಕೆರೆ ವೀಳ್ಯದೆಲೆ ಮತ್ತು ಅಡಿಕೆಗೆ ಪ್ರಸಿದ್ಧಿ ಪಡೆದಿರುವ ಪ್ರದೇಶ. ಇಲ್ಲಿ ಶುಭಕಾರ್ಯಗಳ ಸಂದರ್ಭದಲ್ಲಿ ವೀಳ್ಯದೆಲೆಯಲ್ಲಿ ಅಡಿಕೆ ಹಾಗೂ ಹಣವನ್ನಿಟ್ಟು ಗೌರವದಿಂದ ನೀಡುವ ಸಂಪ್ರದಾಯ ಇಂದಿಗೂ ಬಡವರಿಂದ ಶ್ರೀಮಂತರವರೆಗೆ ಮುಂದುವರಿದಿದೆ. ಪಾಳೇಗಾರರ ಆಡಳಿತದ ಇತಿಹಾಸ ಹೊಂದಿರುವ ಈ ನೆಲವು ಜಾನಪದ, ಕಲೆ, ಕುಸ್ತಿ ಸೇರಿದಂತೆ ವಿವಿಧ ಕ್ಷೇತ್ರಗಳಲ್ಲಿ ಸಾಧಕರನ್ನು ರೂಪಿಸಿದೆ. ಇದೀಗ ಶೈಕ್ಷಣಿಕ ಕ್ಷೇತ್ರದಲ್ಲಿ ಆಫ್ರಿನ್ ಅವರ ಸಾಧನೆಯೂ ತರೀಕೆರೆಯ ಹೆಮ್ಮೆಗೆ ಮತ್ತೊಂದು ಗರಿಯನ್ನು ಸೇರಿಸಿದೆ.

ವೃತ್ತಿಯಲ್ಲಿ ವಕೀಲರಾಗಿರುವ ಇರ್ಫಾನ್ ಅಹ್ಮದ್ ಬೇಗ್ ಹಾಗೂ ಶಿಕ್ಷಕಿಯಾಗಿರುವ ರೋಹಿ ಫಿರ್ದೋಸ್ ದಂಪತಿಯ ಪುತ್ರಿಯಾದ ಆಫ್ರಿನ್, ಎಲೆಕ್ಟ್ರಾನಿಕ್ಸ್ ಆ್ಯಂಡ್ ಟೆಲಿಕಮ್ಯುನಿಕೇಷನ್ ಇಂಜಿನಿಯರಿಂಗ್ ಪದವಿಯಲ್ಲಿ ವಿಶ್ವೇಶ್ವರಯ್ಯ ತಾಂತ್ರಿಕ ವಿಶ್ವವಿದ್ಯಾಲಯದ (ವಿಟಿಯು) ಅಡಿಯಲ್ಲಿ ರಾಜ್ಯಕ್ಕೆ ಮೂರನೇ ರ‍್ಯಾಂಕ್ ಗಳಿಸಿದ್ದಾರೆ.

ಆಫ್ರಿನ್ ಅವರು ತರೀಕೆರೆಯ ಎ.ಇ.ಪಿ.ಎಸ್. ಶಿಕ್ಷಣ ಸಂಸ್ಥೆಯಲ್ಲಿ ಒಂದರಿಂದ ಹತ್ತನೇ ತರಗತಿಯವರೆಗೆ ಪ್ರಾಥಮಿಕ ಹಾಗೂ ಪ್ರೌಢಶಿಕ್ಷಣ ಪೂರ್ಣಗೊಳಿಸಿದರು. ಬಳಿಕ ಕೊಡಗಿನ ನಾಪೋಕ್ಲುವಿನಲ್ಲಿ ಪಿಯುಸಿ ಶಿಕ್ಷಣ ಪಡೆದ ಅವರು, ಶಿವಮೊಗ್ಗದ ಜೆ.ಎನ್.ಎನ್. ಕಾಲೇಜ್ ಆಫ್ ಇಂಜಿನಿಯರಿಂಗ್‌ನಲ್ಲಿ ಇಂಜಿನಿಯರಿಂಗ್ ಪದವಿ ಅಭ್ಯಾಸ ಮಾಡಿ ಈ ಗಮನಾರ್ಹ ಸಾಧನೆ ಮಾಡಿದ್ದಾರೆ.

ಆಫ್ರಿನ್ ಅವರ ಶೈಕ್ಷಣಿಕ ಸಾಧನೆಯಷ್ಟೇ ಗಮನ ಸೆಳೆಯುವ ಮತ್ತೊಂದು ಸಂಗತಿಯೆಂದರೆ ಕನ್ನಡ ಭಾಷೆಯ ಮೇಲಿನ ಅವರ ಪ್ರೀತಿ ಮತ್ತು ಹಿಡಿತ. ಕನ್ನಡಿಗರನ್ನೂ ಮೆಚ್ಚಿಸುವ ರೀತಿಯಲ್ಲಿ ಸ್ಪಷ್ಟವಾಗಿ, ನಿರರ್ಗಳವಾಗಿ ಕನ್ನಡ ಮಾತನಾಡುವ ಹಾಗೂ ಬರೆಯುವ ಕೌಶಲವನ್ನು ಅವರು ಬೆಳೆಸಿಕೊಂಡಿದ್ದಾರೆ. ಕುಟುಂಬದ ಹಿರಿಯರಿಗಿಂತಲೂ ಮಿಗಿಲಾಗಿ ಕನ್ನಡವನ್ನು ಅರಳುಹುರಿದಂತೆ ಮಾತನಾಡುವ ಅವರ ಭಾಷಾ ಪ್ರಾವೀಣ್ಯ ಕನ್ನಡದ ಮೇಲಿನ ಅಭಿಮಾನಕ್ಕೆ ಸಾಕ್ಷಿಯಾಗಿದೆ.

ಪೋಷಕರ ಪ್ರೋತ್ಸಾಹ, ಕುಟುಂಬದ ಬೆಂಬಲ ಹಾಗೂ ಸ್ವಂತ ಪರಿಶ್ರಮದ ಫಲವಾಗಿ ಆಫ್ರಿನ್ ಈ ಸಾಧನೆ ಮಾಡಿದ್ದಾರೆ. ಅವರ ಯಶಸ್ಸು ವಿದ್ಯಾರ್ಥಿಗಳಿಗೆ ಪ್ರೇರಣೆಯಾಗುವುದರ ಜೊತೆಗೆ, ಪ್ರತಿಭೆಗೆ ಧರ್ಮದ ಗಡಿಗಳಿಲ್ಲ ಎಂಬ ಸಂದೇಶವನ್ನೂ ಸಾರುತ್ತದೆ.

ವೇತನದ ಉದ್ಯೋಗಕ್ಕಷ್ಟೇ ಸೀಮಿತವಾಗದೆ, ಇಂಜಿನಿಯರಿಂಗ್ ಕ್ಷೇತ್ರದಲ್ಲಿ ಉನ್ನತ ಶಿಕ್ಷಣ ಮತ್ತು ಸಂಶೋಧನೆಯ ಮೂಲಕ ಇನ್ನಷ್ಟು ಸಾಧನೆಗಳನ್ನು ಮಾಡುವ ಅವಕಾಶಗಳು ಆಫ್ರಿನ್ ಅವರ ಮುಂದಿವೆ. ತಮ್ಮ ಪ್ರತಿಭೆ, ಪರಿಶ್ರಮ ಹಾಗೂ ಜ್ಞಾನದಿಂದ ಮುಂದಿನ ದಿನಗಳಲ್ಲಿಯೂ ಹೊಸ ಎತ್ತರಗಳನ್ನು ತಲುಪಿ ಕುಟುಂಬಕ್ಕೆ, ತರೀಕೆರೆಗೆ ಹಾಗೂ ನಾಡಿಗೆ ಮತ್ತಷ್ಟು ಕೀರ್ತಿ ತರಲಿ ಎಂಬುದು ಎಲ್ಲರ ಆಶಯವಾಗಿದೆ.

Afrin from Tarikere secures third rank in the state in engineering.