ಆಧುನಿಕ ಸೌಲಭ್ಯಗಳೊಂದಿಗೆ ಮಿಲನ್ ಚಿತ್ರಮಂದಿರ ಪುನರಾರಂಭ

ಚಿಕ್ಕಮಗಳೂರು: ದಶಕಗಳ ಕಾಲ ಸಿನಿ ರಸಿಕರಿಗೆ ಭರಪೂರ ಮನರಂಜನೆ ಒದಗಿಸಿ ಕಳೆದೆರಡು ವರ್ಷಗಳ ಹಿಂದೆ ಮುಚ್ಚಲ್ಪಟ್ಟಿದ್ದ ನಗರದ ಮಿಲನ್ ಚಿತ್ರಮಂದಿರ ಆಧುನಿಕ ಸೌಲಭ್ಯಗಳೊಂದಿಗೆ ಪುನರಾರಂಭಗೊಂಡಿದೆ.

ಗುರುವಾರ ಚಿತ್ರಮಂದಿರದ ಸಭಾಂಗಣದಲ್ಲಿ ನಡೆದ ಸರಳ ಸಮಾರಂಭದಲ್ಲಿ ಶಾಸಕ ಎಚ್.ಡಿ.ತಮ್ಮಯ್ಯ ನವೀಕೃತ ಚಿತ್ರಮಂದಿರವನ್ನು ಉದ್ಘಾಟಿಸಿ ಈ ವೇಳೆ ಮಾತನಾಡಿದ ಅವರು, ಮಿಲನ್ ಚಿತ್ರಮಂದಿರ ಮುಚ್ಚಲ್ಪಟ್ಟಾಗ ಚಿತ್ರ ರಸಿಕರಿಗೆ ತೀವ್ರ ದುಃಖ, ನಿರಾಸೆ ಉಂಟಾಗಿತ್ತು. ಹೆಚ್ಚು ಕುಟುಂಬ ಸಮೇತ ವೀಕ್ಷಿಸಬಹುದಾದ ಅದರಲ್ಲೂ ಡಾ.ರಾಜ್‌ಕುಮಾರ್ ನಟನೆಯ ಬಹುತೇಕ ಚಿತ್ರಗಳು ಮಿಲನ್ ಚಿತ್ರಮಂದಿರದಲ್ಲಿ ಪ್ರದರ್ಶಿಸಲ್ಪಟ್ಟಿವೆ ಎಂದು ತಿಳಿಸಿದರು.

ಕಲಾವಿದರನ್ನು ಪ್ರೋತ್ಸಾಹಿಸಬೇಕಾದದ್ದು ಅಭಿಮಾನಿಗಳ ಕರ್ತವ್ಯ. ಚಲನ ಚಿತ್ರಗಳನ್ನು ನೋಡುವ ಅಭಿರುಚಿ ಹೊಂದಿದವರಿಗೆ ಇಂದಿಗೂ ಚಿತ್ರಮಂದಿರಕ್ಕೆ ಬರಬೇಕು ಎನ್ನುವ ಅಭಿಲಾಶೆ ಇರುತ್ತದೆ. ಆದರೆ ಇಂದಿನ ಡಿಜಿಟಲ್ ತಂತ್ರಜ್ಞಾನದಿಂದಾಗಿ ಎಲ್ಲವೂ ಸಾಮಾಜಿಕ ಜಾಲತಾಣಗಳು, ಮೊಬೈಲ್‌ನಲ್ಲಿ ಲಭ್ಯವಿರುವುದಲ್ಲದೆ. ಮನೆಗಳಲ್ಲೇ ಹೋಂ ಥಿಯೇಟರ್‌ಗಳು ಇರುವುದರ ಜೊತೆಗೆ ಚಿತ್ರ ಬಿಡುಗಡೆ ಆಗಿ ಕೆಲವೇ ದಿನಗಳಲ್ಲಿ ಅದರ ಪ್ರತಿ ಎಲ್ಲರಿಗೂ ಲಭ್ಯವಾಗುತ್ತಿರುವುದರಿಂದ ಚಿತ್ರಮಂದಿರದ ಕಡೆಗೆ ಬರುವವರ ಸಂಖ್ಯೆ ಕಡಿಮೆ ಆಗುತ್ತಿದೆ. ಆದರೂ ಚಿತ್ರಮಂದಿರದಲ್ಲಿ ಸಿನಿಮಾ ವೀಕ್ಷಿಸುವ ಅನುಭವವೇ ಬೇರೆ ಎಂದರು.

ವಿಧಾನ ಪರಿಷತ್ ಸದಸ್ಯ ಸಿ.ಟಿ.ರವಿ ಮಾತನಾಡಿ, ಚಲನ ಚಿತ್ರಗಳು ಬಂದ ನಂತರ ನಾಟಕಗಳ ಪ್ರಭಾವ ಕಡಿಮೆ ಆಗಿತ್ತು. ಆದರೆ ಈಗ ಟಿ.ವಿ., ಮೊಬೈಲ್ ಇನ್ನಿತರೆ ಡಿಜಿಟಲ್ ಮಾಧ್ಯಮಗಳು ಬಂದ ಮೇಲೆ ಸಿನಿಮಾಗಳನ್ನು ಚಿತ್ರಮಂದಿರಗಳಲ್ಲಿ ವೀಕ್ಷಿಸುವುದು ಕಡಿಮೆ ಆಗುತ್ತಿದೆ. ಆದರೂ ಒಳ್ಳೆಯ ಚಿತ್ರಗಳು ಬಂದರೆ ಜನ ಸಾಲುಗಟ್ಟಿ ಬರುತ್ತಿದ್ದಾರೆ ಎಂದರು.

ಹಿಂದೆ ಸರತಿಯಲ್ಲಿ ನಿಲ್ಲದೆ, ಪ್ರಭಾವ ಬಳಸಿ ಟಿಕೆಟ್ ಪಡೆದು ಸಿನಿಮಾ ನೋಡುವುದೆಂದರೆ ಒಂದು ಪ್ರತಿಷ್ಠೆಯ ವಿಚಾರವಾಗುತ್ತಿತ್ತು. ಅಂತಹ ದಿನಗಳು ಮತ್ತೆ ಬರಲಿ ಎಂದು ಆಶಿಸುತ್ತೇವೆ ಎಂದರು.
ಹಿಂದೆ ಚಲನಚಿತ್ರ ಸಾಹಿತ್ಯ, ಸಂಗೀತ ಅರ್ಥಗರ್ಭಿತವಾಗಿ, ಪ್ರಾಸವೂ ಇರುತ್ತಿತ್ತು. ಆದರೆ ಈಗ ಅಂತಹ ಸಾಹಿತ್ಯವು ಕಡಿಮೆ ಆಗಿದೆ. ಸಮಾಜದ ಸ್ಥರವೇ ಹೀಗೆ ಆಗಿದೆಯೂ ಗೊತ್ತಿಲ್ಲ. ಹಿಂದೆ ಚಲನ ಚಿತ್ರಗಳು ಸತ್ಪ್ರೇರಣೆ ನೀಡುತ್ತಿದ್ದವು. ಆರೀತಿ ಚಲನ ಚಿತ್ರಗಳು ಮತ್ತೆ ಬರಲಿ ಎಂದರು.

ವಿಧಾನ ಪರಿಷತ್ ಸದಸ್ಯೆ ಗಾಯತ್ರಿ ಶಾಂತೇಗೌಡ, ಕರ್ನಾಟಕ ಚಲನಚಿತ್ರ ವಾಣಿಜ್ಯಮಂಡಳಿ ಮಾಜಿ ಅಧ್ಯಕ್ಷರಾದ ಎಸ್.ಎ.ಚಿನ್ನೇಗೌಡ, ಚಿತ್ರ ನಿರ್ಮಾಪಕರಾದ ಪುಷ್ಪಾ ಅರುಣ್ ಕುಮಾರ್, ಮಿಲನ್ ಚಿತ್ರಮಂದಿರದ ಮಾಲೀಕರಾದ ಕೆ.ರಮೇಶ್ ಮುಖ್ಯ ಅತಿಥಿಗಳಾಗಿ ಮಾತನಾಡಿದರು.

ಚಲನಚಿತ್ರ ವಿತರಕರೂ, ಶ್ರೀಧರ ಕೃಪಾ ಕಂಬೈನ್ಸ್‌ನ ಮಾಲೀಕರೂ ಆದ ಶ್ರೀಧರ ಶ್ಯಾಮನೂರು ಸೇರಿದಂತೆ ವಿವಿಧ ಸಂಘ-ಸಂಸ್ಥೆಗಳ ಪ್ರಮುಖರು ಭಾಗವಹಿಸಿದ್ದರು. ಚಿತ್ರಮಂದಿರ ಪುನರಾರಂಭದ ಅಂಗವಾಗಿ ಡಾ.ರಾಜ್ ಕುಮಾರ್ ನಟನೆಯ ಗಂಧದ ಗುಡಿ ಚಿತ್ರದ ಉಚಿತ ಪ್ರದರ್ಶನವನ್ನು ಏರ್ಪಡಿಸಲಾಗಿತ್ತು.

Milan cinema reopens with modern facilities