ಕಾರ್ಮಿಕನಿಗೆ ಲಕ್ಷಾಂತರ ರೂಪಾಯಿ ಹಣ ವಂಚನೆ

ಕಡೂರು: ಬಿಸಿಲಿನಲ್ಲಿ ಬೆವರು ಸುರಿಸಿ, ಹಗಲಿರುಳು ಗಾರೆ ಕೆಲಸ ಮಾಡಿ ಕೂಡಿಟ್ಟಿದ್ದ ಕಾರ್ಮಿಕನೊಬ್ಬನ ಲಕ್ಷಾಂತರ ರೂಪಾಯಿ ಹಣವನ್ನು ಸೈಬ‌ರ್ ವಂಚಕರು ಕೇವಲ ಕೆಲವೇ ನಿಮಿಷಗಳಲ್ಲಿ ಲೂಟಿ ಮಾಡಿರುವ ಆಘಾತಕಾರಿ ಘಟನೆ ಕಡೂರಿನಲ್ಲಿ ನಡೆದಿದೆ. ಮೊಬೈಲ್ ಹ್ಯಾಕ್ ಮಾಡುವ ಮೂಲಕ ವ್ಯಕ್ತಿಯ ಗಮನಕ್ಕೆ ಬಾರದಂತೆ ಒಟಿಪಿ ಪಡೆದು, ಬ್ಯಾಂಕ್ ಖಾತೆಯಲ್ಲಿದ್ದ ಬರೋಬ್ಬರಿ 7.41 ಲಕ್ಷ ರೂಪಾಯಿಗಳನ್ನು ದೋಚಲಾಗಿದೆ.
<
ಕಡೂರಿನ ನಿವಾಸಿ, ಗಾರೆ ಕೆಲಸಗಾರ ಪ್ರದೀಪ್ ಎಂಬುವವರೇ ಸೈಬರ್ ಖದೀಮರ ಜಾಲಕ್ಕೆ ಸಿಲುಕಿ ಹಣ ಕಳೆದುಕೊಂಡ ದುರ್ದೈವಿ. ಪ್ರದೀಪ್ ಅವರ ಮೊಬೈಲ್‌ಗೆ ದಿಢೀರನೆ ಯಾವುದೇ ಕರೆ ಅಥವಾ ಮೆಸೇಜ್ ಬರುವುದು ನಿಂತಿತ್ತು. ಇದೊಂದು ಸಾಮಾನ್ಯ ನೆಟ್ವರ್ಕ್ ಸಮಸ್ಯೆ ಅಥವಾ ಮೊಬೈಲ್ ದೋಷವಿರಬಹುದು ಎಂದು ಭಾವಿಸಿದ ಅವರು, ಅದನ್ನು ಸರಿಪಡಿಸಲು ಸ್ಥಳೀಯ ಮೊಬೈಲ್ ಅಂಗಡಿಗೆ ತೆರಳಿದ್ದಾರೆ. ಅಂಗಡಿಯಲ್ಲಿ ಸರಿಪಡಿಸಿಕೊಂಡು ಬಂದ ಕೆಲವೇ ಕ್ಷಣಗಳಲ್ಲಿ ಅವರ ಮೊಬೈಲ್‌ಗೆ ಏಕಾಏಕಿ ಸಾಲು ಸಾಲು ಒಟಿಪಿ (OTP) ಮೆಸೇಜ್‌ಗಳು ಬರಲು ಶುರುವಾಗಿವೆ.

ಸತತವಾಗಿ ಬರುತ್ತಿರುವ ಒಟಿಪಿ ಸಂದೇಶಗಳನ್ನು ಕಂಡು ಕಂಗಾಲಾದ ಪ್ರದೀಪ್, ತಕ್ಷಣವೇ ತಮ್ಮ ಬ್ಯಾಂಕ್ ಖಾತೆಯನ್ನು ಪರಿಶೀಲಿಸಿದ್ದಾರೆ. ಆಗ ಅವರಿಗೆ ಅಕ್ಷರಶಃ ಆಕಾಶವೇ ಕಳಚಿಬಿದ್ದಂತಾಗಿದೆ. ಕೇವಲ ಕೆಲವೇ ನಿಮಿಷಗಳ ಅಂತರದಲ್ಲಿ ಹಂತ ಹಂತವಾಗಿ ಅವರ ಖಾತೆಯಲ್ಲಿದ್ದ ಒಟ್ಟು 7,41,000 ಕ್ಕೂ ಅಧಿಕ ರೂಪಾಯಿಗಳು ಬೇರೆ ಬೇರೆ ಅಪರಿಚಿತ ಖಾತೆಗಳಿಗೆ ವರ್ಗಾವಣೆಯಾಗಿರುವುದು ಬೆಳಕಿಗೆ ಬಂದಿದೆ. ಸೈಬರ್ ವಂಚಕರು ಅತ್ಯಂತ ಚಾಲಾಕಿತನದಿಂದ ಮೊಬೈಲ್ ಹ್ಯಾಕ್ ಮಾಡಿ, ಪ್ರದೀಪ್ ಅವರ ಅರಿವಿಗೆ ಬಾರದಂತೆ ಒಟಿಪಿ ಪಡೆದು ಈ ಬೃಹತ್ ವಂಚನೆ ಎಸಗಿದ್ದಾರೆ.

ಕೂಲಿ ಮಾಡಿ ಜೀವನ ಸಾಗಿಸುತ್ತಿದ್ದ ಕಾರ್ಮಿಕ, ಇದೀಗ ತನ್ನ ಜೀವಮಾನದ ಸಂಪಾದನೆಯನ್ನೆಲ್ಲ ಕಳೆದುಕೊಂಡು ಕಣ್ಣೀರು ಹಾಕುತ್ತಿದ್ದಾನೆ. ಘಟನೆಗೆ ಸಂಬಂಧಿಸಿದಂತೆ ಪ್ರದೀಪ್ ಅವರು ತಕ್ಷಣವೇ ಸೈಬರ್ ಕ್ರೈಂ ಪೊಲೀಸ್ ಠಾಣೆಗೆ ದೂರು ನೀಡಿದ್ದು, ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ವಂಚಕರ ಪತ್ತೆಗಾಗಿ ಜಾಲ ಬೀಸಿದ್ದಾರೆ. ಸ್ಮಾರ್ಟ್ ಫೋನ್ ಬಳಕೆದಾರರು ಮೊಬೈಲ್‌ನಲ್ಲಿ ಅಸಹಜ ಬದಲಾವಣೆಗಳಾದರೆ ಅಥವಾ ಕರೆ ಮೆಸೇಜ್‌ಗಳು ದಿಢೀರ್ ಸ್ಥಗಿತಗೊಂಡರೆ ತಕ್ಷಣವೇ ಎಚ್ಚೆತ್ತುಕೊಂಡು ಬ್ಯಾಂಕ್ ಖಾತೆಗಳನ್ನು ಸುರಕ್ಷಿತಪಡಿಸಿಕೊಳ್ಳಬೇಕು ಎಂಬುದಕ್ಕೆ ಈ ಘಟನೆ ದೊಡ್ಡ ಎಚ್ಚರಿಕೆಯ ಗಂಟೆಯಾಗಿದೆ.

Worker defrauded of lakhs of rupees