ಹಳೆಯ ಬೈಕ್ ಅಲ್ಲೇ ಬಿಟ್ಟು ಹೊಸ ಬೈಕ್ಕ‌ ಎಗರಿಸಿದ ಕಳ್ಳರು

ಚಿಕ್ಕಮಗಳೂರು:  ಸಾಮಾನ್ಯವಾಗಿ ಕಳ್ಳರು ಬೈಕ್ ಕಳ್ಳತನ ಮಾಡಿದರೆ ಸಾಕು ಎಂದು ಓಡಿಹೋಗುತ್ತಾರೆ. ಆದರೆ ಕಾಫಿನಾಡು ಚಿಕ್ಕಮಗಳೂರಿನಲ್ಲಿ ಕಿಲಾಡಿ ಕಳ್ಳರು ಒಂದು ಹೆಜ್ಜೆ ಮುಂದೆ ಹೋಗಿ ವಿಭಿನ್ನವಾಗಿ ಬೈಕ್ ಕಳ್ಳತನಕ್ಕೆ ಮುಂದಾಗಿದ್ದಾರೆ.

ಬೈಕ್ ಕಳೆದುಕೊಂಡ ಮಾಲೀಕರು ಅಯ್ಯೋ ಬೈಕ್ ಹೋಯ್ತಲ್ಲಾ ಎಂದು ಅತಿಯಾಗಿ ಬೇಜಾರು ಮಾಡಿಕೊಳ್ಳಬಾರದು ಎಂಬ ‘ಉದಾರ ಮನಸ್ಸಿನಿಂದ’ ತಾವೇ ಒಂದು ಹಳೆಯ ಬೈಕನ್ನು ಅಲ್ಲೇ ಬಿಟ್ಟು, ಮಾಲೀಕರ ಹೊಸ ಬೈಕನ್ನು ಎಗರಿಸಿದ್ದಾರೆ!

ಪ್ರತಿದಿನದಂತೆ ಇಸ್ಮಾಯಿಲ್ ಅವರು ಕೆಲಸ ಮುಗಿಸಿ ರಾತ್ರಿ ತಮ್ಮ ಮನೆಯ ಮುಂದೆ ಬೈಕನ್ನು ಸುರಕ್ಷಿತವಾಗಿ ನಿಲ್ಲಿಸಿದ್ದರು. ಆದರೆ ತಡರಾತ್ರಿ ಬಂದ ಕಳ್ಳರು ಅಲ್ಲಿ ಸಿನಿಮೀಯ ಶೈಲಿಯಲ್ಲಿ ಕೈಚಳಕ ತೋರಿಸಿದ್ದಾರೆ.

ಕಳ್ಳರ ಈ ವಿಚಿತ್ರ ತಂತ್ರ ಕಂಡು ಜನರಲ್ಲಿ ಕುತೂಹಲ ಮೂಡಿಸಿದೆಯಾದರೂ, ಮನೆ ಮುಂದೆ ಬೈಕ್ ನಿಲ್ಲಿಸುವವರಿಗೆ ಆತಂಕ ಶುರುವಾಗಿದೆ. ಬೈಕ್ ಕೊಟ್ಟು ಬೈಕ್ ಪಡೆಯುವ ಈ ‘ಬಾರ್ಟರ್ ಸಿಸ್ಟಮ್’ ಕಳ್ಳತನ ಸದ್ಯ ಚಿಕ್ಕಮಗಳೂರಿನಲ್ಲಿ ಹಾಟ್ ಟಾಪಿಕ್ ಆಗಿದೆ.

ಈ ವಿಚಿತ್ರ ಕಳ್ಳತನದ ದೃಶ್ಯಗಳು ಸಮೀಪದ ಮನೆಯ ಸಿಸಿಟಿವಿ ಕ್ಯಾಮೆರಾದಲ್ಲಿ ಸ್ಪಷ್ಟವಾಗಿ ದಾಖಲಾಗಿವೆ. ವಿಡಿಯೋದಲ್ಲಿ ಕಳ್ಳರು ಯಾವುದೇ ಭಯವಿಲ್ಲದೆ, ಅತ್ಯಂತ ನಿಧಾನವಾಗಿ ಮತ್ತು ಸಮಾಧಾನವಾಗಿ ಪರಿಸ್ಥಿತಿಯನ್ನು ಗಮನಿಸಿ ಈ ಕೃತ್ಯ ಎಸಗಿರುವುದು ಗೋಚರಿಸುತ್ತದೆ. ಬೈಕ್ ಕಳ್ಳರು ಎಷ್ಟು ಸಮಯ ತೆಗೆದುಕೊಂಡು ಈ ಕಾರ್ಯಾಚರಣೆ ಮಾಡಿದ್ದಾರೆ ಎನ್ನುವುದೇ ಆಶ್ಚರ್ಯಕರವಾಗಿದೆ.

ಈ ಘಟನೆ ಕುರಿತು ಚಿಕ್ಕಮಗಳೂರಿನ ಬಸವನಹಳ್ಳಿ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಾಗಿದೆ. ಪೊಲೀಸರು ಸಿಸಿಟಿವಿ ದೃಶ್ಯಾವಳಿಗಳನ್ನು ಆಧರಿಸಿ, ಈ ‘ಎಕ್ಸ್‌ಚೇಂಜ್ ಆಫರ್’ ಕೊಟ್ಟು ಪರಾರಿಯಾಗಿರುವ ಖದೀಮರಿಗಾಗಿ ಜಾಲ ಬೀಸಿದ್ದಾರೆ. ಒಟ್ಟಿನಲ್ಲಿ ಕಳ್ಳರ ಈ ಹೊಸ ಐಡಿಯಾ ನೋಡಿ ಪೊಲೀಸರೇ ಬೆರಗಾಗಿದ್ದು, ಶೀಘ್ರವೇ ಆರೋಪಿಗಳನ್ನು ಪತ್ತೆ ಹಚ್ಚುವ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.

Thieves left the old bike there and stole the new one