ಕೆಎಸ್‌ಆರ್‌ಟಿಸಿ ಬಸ್‌ ನಲ್ಲಿ ತರಕಾರಿ ಸರಕು ಸಗಾಟ

ಚಿಕ್ಕಮಗಳೂರು: ಕೆಎಸ್‌ಆರ್‌ಟಿಸಿ ಬಸ್‌ಗಳು ಪ್ರಯಾಣಿಕರನ್ನು ಕರೆದೊಯ್ಯುವ ಬದಲು ತರಕಾರಿ ಸರಕು ವಾಹನಗಳಾಗಿ ಬದಲಾಗುತ್ತಿದ್ದು, ಸಾರ್ವಜನಿಕರಲ್ಲಿ ಅಸಮಾಧಾನ ಮೂಡಿಸಿದೆ. ಚಿಕ್ಕಮಗಳೂರಿನಿಂದ ಬಾಳೆಹೊನ್ನೂರು ಮಾರ್ಗವಾಗಿ ಶೃಂಗೇರಿಗೆ ಸಂಚರಿಸುವ ಸರ್ಕಾರಿ ಬಸ್‌ಗಳಲ್ಲಿ ನಿತ್ಯವೂ ಶೃಂಗೇರಿಯ ತರಕಾರಿ ಅಂಗಡಿಗಳಿಗೆ ಬೇಕಾದ ಮೂಟೆಗಳನ್ನು ಸೀಟುಗಳ ಮೇಲೆಯೇ ಲೋಡ್ ಮಾಡಲಾಗುತ್ತಿದೆ.

ನಿಯಮಾನುಸಾರ ಪ್ರಯಾಣಿಕರ ಲಗೇಜ್ ಜಾಗದಲ್ಲಿಡಬೇಕಾದ ಸರಕನ್ನು ನೇರವಾಗಿ ಬಸ್ಸಿನ ಹಿಂಬದಿಯ ಸೀಟುಗಳ ಮೇಲೆಯೇ ರಾಶಿ ಹಾಕುತ್ತಿರುವುದು ಸಿಬ್ಬಂದಿಯ ಬೇಜವಾಬ್ದಾರಿಗೆ ಸಾಕ್ಷಿಯಾಗಿದೆ.

ಒಂದೆಡೆ ಸರಿಯಾದ ಸಮಯಕ್ಕೆ ಬಸ್‌ಗಳಿಲ್ಲದೇ ನಿತ್ಯ ಶಾಲೆ-ಕಾಲೇಜುಗಳಿಗೆ ತೆರಳುವ ವಿದ್ಯಾರ್ಥಿಗಳು ಪರದಾಡುತ್ತಿದ್ದರೆ, ಮತ್ತೊಂದೆಡೆ ಹಿರಿಯ ನಾಗರಿಕರು ಮತ್ತು ಮಹಿಳೆಯರು ಸೀಟು ಸಿಗದೆ ಬರೋಬ್ಬರಿ ನೂರು ಕಿಲೋಮೀಟರ್‌ಗಳಿಗೂ ಅಧಿಕ ದೂರ ನಿಂತೇ ಪ್ರಯಾಣಿಸಬೇಕಾದ ನರಕಯಾತನೆ ಎದುರಾಗಿದೆ.

ಕಣ್ಣೆದುರೇ ಸೀಟುಗಳು ತರಕಾರಿ ಮೂಟೆಗಳಿಂದ ಭರ್ತಿಯಾಗಿದ್ದರೂ ಜನಸಾಮಾನ್ಯರು ಕೈಕಟ್ಟಿ ನಿಲ್ಲುವ ಪರಿಸ್ಥಿತಿ ನಿರ್ಮಾಣವಾಗಿದೆ. ದಿನನಿತ್ಯದ ಈ ಅಕ್ರಮ ಸಾಗಾಟಕ್ಕೆ ಕೆಎಸ್‌ಆರ್‌ಟಿಸಿ ಸಿಬ್ಬಂದಿಯೇ ಸಾಥ್ ನೀಡುತ್ತಿದ್ದಾರೆ ಎಂದು ಕೆಂಡಾಮಂಡಲವಾಗಿರುವ ಪ್ರಯಾಣಿಕರು, ಸಂಬಂಧಪಟ್ಟ ಹಿರಿಯ ಅಧಿಕಾರಿಗಳು ಕೂಡಲೇ ಸ್ಥಳ ಪರಿಶೀಲನೆ ನಡೆಸಿ ಕರ್ತವ್ಯಲೋಪ ಎಸಗಿರುವ ಸಿಬ್ಬಂದಿ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಬೇಕೆಂದು ಆಗ್ರಹಿಸಿದ್ದಾರೆ.

Transportation of vegetables in KSRTC buses